Plantun de Prouvènço

Pèr coumpara dos planto d'encò nostre

Caucalis platycarpos & Panicum barbipulvinatum

Garroto-fèro

Caucalis platycarpos

Apiaceae Umbelliferae

Autre noum : Gousset.

Noms en français : Caucalide, Caucalis à fruits plats.

Descripcioun :
La garroto-fèro dóu gènre Caucalis trachis dins li relarg roucaious e roucassous. Porto de pichot brout de 2 à 5 rai, emé li petalo di flour dóu deforo un pau mai grando (2 à 3 mm). Mai se recounèis subretout à si fru, noumbrous, un pau plat e espinous. Avisas-vous de pas vous engana emé lou grapoun, Orlaya platycarpos que trachis dins li mémis endré e que li flour ié sèmblon proun (bratèio primo pèr la garroto-fèro e larjo pèr lou grapoun).

Usanço :
Es uno planto manjadisso, e qu'èro manjado i'a gaire dins lou relarg de Mountpelié. Pamens se dis qu'èi proun amaro e cousènto crudo. En Anatolìo l'acampon toujour.

Port : Erbo
Taio : 10 à 40 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Caucalis
Famiho : Apiaceae
Famiho classico : Umbelliferae

Ordre : Apiales

Coulour de la flour : Blanco
Petalo : 5
Ø (o loungour) flour : 4 à 6 mm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Tepiero roucaiouso - Roucas - Champ - Meissoun
Estànci : Mesoumediterran à Mountagnard
Couroulougi : Mediterranenco-Touranieno
Ref. sc. : Caucalis platycarpos L., 1753

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.